Hab an Kranz am Türstock hänga.
Vorfreid broadt si in mir aus,
kau nur mehr ans Christkind denga,
Glück und Friedn warman mei Haus.
Denk an tausend frohe Sachn,
hab fürs Fest noh vü zum toa,
werd vielleicht heut Packal machn,
oder Keks für mi alloa!
Kinnt vielleicht ah d’Fenster putzn,
dass mih d’Weihnachtsengln sehgn,
oder kinnt den Abend nutzn,
mi a wenig in d’Sauna legn!
Denk an d’Kinder, de boid kemman,
an de frohe Zeit, de kimmt,
wia mia olli dann recht schlemman,
und a Liad uns heiter stimmt!
Weihnachtn is niamois scheena
ois in unsrer Fantasie,
siahg mein Weihnachtsfilm abrenna,
Vorfreid – meih, wia brauch i di!
D’Vorfreid is a Teil vom Ganzn,
sie macht glücklih, stimmt uns ei,
durch die Fantasie-Welt tanzn,
macht uns froh und macht uns frei!
Monika Krautgartner
